“LET’S SING VIETNAM” УРАЛДААНЫ ШАГНАЛ ГАРДУУЛАХ ЁСЛОЛЫН АРГА ХЭМЖЭЭ БОЛОВ

Вьетнамын дуу хоолой нэгдэл (VOV)-ээс зохион байгуулсан “Let’s sing Vietnam” олон улсын дууны уралдааны шагнал гардуулах ёслолын арга хэмжээ энэ сарын 18-ны өдөр Ханой хотноо болов. Арга хэмжээнд ВКН-ын Төв Хорооны нарийн бичгийн дарга, Төв Хорооны Харилцаа холбоо, боловсролын комиссын дарга Нгуен Чонг Нгхиа, Соёл, спорт, аялал жуулчлалын дэд сайд Та Куанг Донг зэрэг вьетнамын өндөр түвшний удирдлагууд болон Монгол Улсаас БНСВУ-д суух Элчин сайд Ж.Сэрээжав урилгаар оролцов. 

Монгол Улсын хөгжмийн зохиолч Д.Ариунболдын хөгжим, М.Отгонбаярын үг  “Элгэмсүү Вьетнамд тавтай морилно уу” дууг дуурийн дуучин Г.Энхнаран дуулж, энэхүү уралдааны тэргүүн байрын шагналыг хүртсэн бөгөөд Элчин сайд Ж.Сэрээжав уран бүтээлчдийг төлөөлж тэргүүн байрын шагналын өргөмжлөлийг хүлээн авав. Тус уралдаанд гадаад, дотоодын, мэргэжлийн болон мэргэжлийн бус 888 уран бүтээлч оролцсоноос нийт 16 уран бүтээл тэргүүн, 1, 2, 3, тусгай байрт шалгарсан байна. Шагнал авсан уран бүтээлээс “Элгэмсүү Вьетнамд тавтай морилно уу” дуу нь ганцаараа гадаадын уран бүтээл байснаараа онцлог байв. "Let’s sing Vietnam" уралдааны шилдэг дуунуудыг цаашид Вьетнамын дуу хоолой радио, телевизээр сурталчлахаар төлөвлөж байна.

Эх сурвалж: https://vov.vn/van-hoa/am-nhac